မြန်မာနိုင်ငံအမျိုးသားလူ့အခွင့်အရေးကော်မရှင် ဆောင်ရွက်ချက် အမှတ်စဉ် (၁/၂၀၁၇/ကာကွယ်) (ပညာသင်ကြားခွင့်)

၁။      မန္တလေးတိုင်းဒေသကြီး ၊ ညောင်ဦးခရိုင် ၊ ညောင်ဦးမြို့နယ် ၊ ပျော်ဘွယ်ကျေးရွာနေ ဦးအောင်ပိုက် ၏ သမီး မသဉ္စာငြိမ်းသည် အသက် ၃ နှစ်ခန့်တွင် ဖခင်၏ ထန်းသီးလှီးသည့် ဓားဖြင့် ထိခိုက်မိပြီး ဘယ်ဘက် လက်သူကြွယ်နှင့် လက်ခလယ် နှစ်ချောင်း၏ ပထမ အဆစ်များ ပြတ်တောက်ခဲ့ပါသည်။ ၎င်းမသဉ္စာငြိမ်းသည် ၂၀၁၆ ခုနှစ် အခြေခံပညာအထက်တန်းစာမေးပွဲအား အထက်တန်းကျောင်း (ပုဂံမြို့) မှ ဂုဏ်ထူး ၂ ဘာသာ၊ ရမှတ် (၄၃၅) မှတ်ဖြင့် အောင်မြင်ခဲ့ပြီး ပညာရေးကောလိပ်သို့ လျှောက် ထားခဲ့ရာ ညောင်ဦး ပညာရေးမှူးရုံးမှ ၂၀၁၆ ခုနှစ်၊ နိုဝင်ဘာလခန့်၌ ရွေးချယ်ခံရကြောင်းအကြောင်း ကြားချက်အရ မိတ္ထီလာ ပညာရေးကောလိပ်သို့ သတင်းပို့ရန် သွားရောက်ခဲ့ပါသည်။

၂။      မိတ္တီလာပညာရေးကောလိပ်သို့ ရောက်ရှိစဉ် မသဉ္စာငြိမ်း၏ လက်ချောင်းလေးများ ပြတ်နေခြင်း ကြောင့် ကျောင်းတက်ရန် ငြင်းပယ်ခြင်းခံခဲ့ရကြောင်း မသဉ္စာငြိမ်းက ကော်မရှင်သို့ တိုင်တန်းလာပါသည်။ သို့ဖြစ်၍ မြန်မာနိုင်ငံအမျိုးသားလူ့အခွင့်အရေး ကော်မရှင်မှ စုံစမ်းစစ်ဆေးရေးအဖွဲ့သည် ညောင်ဦးမြို့သို့သွားရောက်၍ တိုင်တန်းသူ၊ ဖခင်နှင့် အဘိုးဖြစ်သူတို့အား ၁၀-၁-၂၀၁၇ ရက်နေ့ နံနက် ၈:၀၀ နာရီမှ ၈:၅၅ အချိန်ထိ ခေါ်ယူတွေ့ဆုံပြီး လိုအပ်သည့် အချက်အလက်များအား မေးမြန်းကာ လူ့အခွင့်အရေးကြေညာစာတမ်း အပိုဒ် ၂၆ ပါ လူတိုင်းတွင် ပညာသင်ယူခွင့် ရှိသည်နှင့်အညီ လည်းကောင်း၊ ကုလသမဂ္ဂ မသန်စွမ်းသူများ အခွင့်အရေးဆိုင်ရာ သဘောတူစာချုပ် အပိုဒ် ၂၄ ပါ ပြဋ္ဌာန်းချက်များနှင့်အညီလည်းကောင်း မသဉ္စာငြိမ်း၏ ဆုံးရှုံးလျက်ရှိသော ပညာသင်ကြားခွင့် ရရှိရေး အတွက် ကူညီဆောင်ရွက်ပေးပါရန် ပညာရေးဝန်ကြီးဌာနမှ တာဝန်ရှိသူများထံသို့ ညှိနှိုင်းမေတ္တာရပ်ခံ အကြောင်းကြားခဲ့ပါသည်။

၃။      ပညာရေးဝန်ကြီးဌာန၏ ပူးပေါင်းဆောင်ရွက်မှုကြောင့် ၎င်းနေ့ ညနေပိုင်းတွင် ပညာရေးမှူးရုံး၊ ညောင်ဦးမြို့နယ်မှ ၂၀၁၆-၂၀၁၇ ပညာသင်နှစ် လုပ်ငန်းခွင်အကြို  ဆရာအတတ်သင် ပညာဒီပလိုမာ သင်တန်း အမှတ်စဉ် (၂၁/၁၆) အစားထိုး တက်ရောက်ခွင့်ရရှိသူများ အမည်စာရင်းတွင် မသဉ္စာငြိမ်း ၏အမည် ပါရှိလာပြီဖြစ်ပါသည်။ သို့ဖြစ်၍ မသဉ္စာငြိမ်းသည်  ၁၁-၁-၂၀၁၇ ရက်နေ့တွင် မိတ္ထီလာ ပညာရေး ကောလိပ်သို့ တက်ရောက်ရန် ဆက်သွယ်ဆောင်ရွက်နေပြီ ဖြစ်ပါသည်။

                                                                        မြန်မာနိုင်ငံအမျိုးသားလူ့အခွင့်အရေးကော်မရှင်

ရက်စွဲ ၊ ၂၀၁၇ ခုနှစ်၊ ဇန်နဝါရီလ  ၁၁ ရက်