တိုင်ကြားစာကွင်းဆင်းစုံစမ်းစစ်ဆေးခြင်းနှင့် လူ့အခွင့်အရေးအကြောင်းသိကောင်းစရာ ရှင်းလင်းဆွေးနွေးပွဲများ ပြုလုပ်ခြင်း

၁။      မြန်မာနိုင်ငံအမျိုးသားလူ့အခွင့်အရေးကော်မရှင် အတွင်းရေးမှူးဦးစစ်မြိုင် ဦးဆောင်သည့် ကော်မရှင်အဖွဲ့ဝင်ဒေါက်တာဉာဏ်ဇော်၊ ဦးခွထီးယိုးတို့ပါဝင်သော အဖွဲ့သည် မန္တလေးတိုင်းဒေသကြီး၊ ပြင်ဦးလွင်ခရိုင်၊ သပိတ်ကျင်းမြို့နယ်၊ ကျောက်ဖျာကျေးရွာအုပ်စု၊ ထူးတွင်းရွာသား(၁၂၉)ဦး၏ တိုင်တန်း ချက်နှင့် ပတ်သက်၍ (၁-၅-၂၀၁၄) ရက်နေ့နှင့် (၂-၅-၂၀၁၄)ရက်နေ့များတွင် သပိတ်ကျင်းမြို့နယ်ရှိ အခင်းဖြစ်နေရာသို့ ကွင်းဆင်း သွားရောက်ပြီး ဒေသခံလူထုနှင့် တွေ့ဆုံခြင်း၊ ဌာနဆိုင်ရာ တာဝန်ရှိသူများ နှင့် ဆွေးနွေးခြင်း၊ သက်သေများအား စစ်ဆေး၍ ထွက်ဆိုချက်များ ရယူခြင်းတို့ကို ဆောင်ရွက်ခဲ့ပါသည်။

          စုံစမ်းစစ်ဆေးတွေ့ရှိချက်အရ တပ်မြေအဖြစ်သိမ်းဆည်းရာတွင် ကျောက်ဖျာကျေးရွာအုပ်စု ထူးတွင်းရွာမှ တောင်သူ (၁၀၈)ဦး၏ စိုက်ပျိုးမြေဧက (၉၀၀)ကျော် ပါဝင်ခဲ့သဖြင့် ကျေးရွာလူထု၏ နစ်နာမှုအတွက် သင့်လျော်သလို ဖြေရှင်းပေးခြင်း၊ ကုစားပေးခြင်းများအား နိုင်ငံတော်အနေဖြင့် သို့မဟုတ် တပ်မတော်အနေဖြင့် ဆောင်ရွက်ပေးသင့်ကြောင်း အကြံပြုခဲ့ပါသည်။

၂။      ကွင်းဆင်းစုံစမ်းစစ်ဆေးမှုအရ (၁၄-၁-၂၀၁၄) ညတွင် ထူးတွင်းရွာ ယာခင်းအတွင်း တည်ဆောက် နေထိုင်သောအိမ်များသို့ တတက (၁၃)မှ အရာရှိနှင့် စစ်သည်အချို့ရောက်ရှိလာပြီး သစ်ကားများ ဖြတ်သန်းခြင်းရှိမရှိ စုံစမ်း၍ ပြန်လည်ထွက်ခွာသွားသောဖြစ်စဉ်သာ ဖြစ်ပွားခဲ့ပြီး တိုင်တန်းဖော်ပြထားသော ယာတဲများကို ဝင်ရောက် ရှာဖွေခြင်း မရှိခဲ့ကြောင်း စစ်ဆေးတွေ့ရှိရပါသည်။

          (၁၅-၁-၂၀၁၄)နေ့လည်တွင် တတက(၁၃)မှ သင်တန်းမှူးဦးစီးသော ကွန်မန်ဒို အကြပ်ကြီး သင်တန်းသားများ တပ်ပါလေ့ကျင့်ခန်းပြုလုပ်ရန် ရောက်ရှိလာပြီး အရာရှိအမိန့်အရ သစ်များ ရှာဖွေ ဖမ်းဆီးပြီးနောက် ကွန်မန်ဒိုတပ်ဖွဲ့ လေ့ကျင့်ခန်းပြုလုပ်ခဲ့ကြောင်း၊ လေ့ကျင့်ခန်းမှာ အသံပေးကျည်စစ် ပစ်ခတ်ခြင်းပါရှိပြီး ဘီအေ (၆၃) မောင်းပြန်ရိုင်ဖယ်ကျည် (၁၆၀)တောင့်နှင့် ဘရင်းဂန်းကျည် (၃၀)တောင့် တို့အား တပ်ကြပ်ကြီး(၂) ဦးမှ ကိုယ်တိုင် လျှိုအတွင်း မြေသားနံရံအား ချိန်ရွယ်၍ အသံပေးပစ်ခတ်ခဲ့ကြောင်း စစ်ဆေးသိရှိရပါသည်။ ဤပစ်ခတ်စဉ်အတွက် ကျေးရွာသို့ ကြိုတင်အသိပေးအကြောင်းကြားခြင်း မရှိသဖြင့် ရွာသား အချို့ ထိတ်လန့်မှုဖြစ်ပေါ် ခဲ့သည်ဟု ယူဆရပါသည်။

          တိုင်တန်းချက်တွင် သစ်များအား တတက (၁၃) အရာရှိများမှ ဖမ်းဆီးသွားကြောင်း ဖော်ပြပါရှိရာ တတက (၁၃)အရာရှိများမှ သစ်များဖမ်းဆီးသည်မှာ မှန်ကန်ပါသည်။ အဆိုပါသစ်ဖမ်းဆီးမှုတွင် ပိုင်ရှင်(၃)ဦး၏ သစ်မာများအား ဖမ်းဆီးရရှိပြီး တွင်းငယ်ရွာ သစ်တောဌာနနှင့် ရဲတပ်ဖွဲ့မှ လက်ခံ သိမ်းဆည်းခဲ့ကြောင်း၊ မြို့နယ်သစ်တော ဦးစီးမှူး၏ တင်ပြချက်အရ သစ်မာ (၁.၇၉၃)တန် ရှိကြောင်း သစ်ပိုင်ရှင်များအား သစ်တောဥပဒေပုဒ်မ ၃၃(က)အရ တစ်ဦးလျှင် ဒါဏ်ငွေ ၁၀၀၀၀ ကျပ် ဒါဏ်ရိုက်  ခဲ့ကြောင်းသိရပါသည်။

          နေ့လည် (၁)နာရီတွင် တပ်မှ အရာရှိများက ဖမ်းဆီးသစ်ပိုင်ရှင် (၂)ဦးကို ၎င်းတို့၏ မော်တော် ဆိုင်ကယ်များဖြင့် တင်ဆောင်လာ၍ တတက (၁၃)ကျောင်းသို့ ခေါ်ဆောင်သွားပြီး တပ်ရေးဗိုလ်ကြီးထံ အပ်နှံခဲ့ကြောင်း ၎င်းတို့(၂)ဦးအား သစ်ကိစ္စနှင့်ပတ်သက်၍ တပ်မတော်မှ ဖမ်းဆီးခြင်းမဟုတ်ကြောင်း ခံဝန်ချုပ် လက်မှတ်ရေးထိုး စေပြီး ညနေ(၅)နာရီခန့်တွင် လွှတ်ပေးခဲ့ကြောင်း စစ်ဆေးသိရှိရပါသည်။

၃။      ကော်မရှင်အဖွဲ့သည် မန္တလေးတိုင်းဒေသကြီးရှိ သပိတ်ကျင်းမြို့၊ မိုးကုတ်မြို့နှင့် ပြင်ဦးလွင်မြို့များ သို့ (၁-၅-၂၀၁၄)ရက်နေ့မှ (၄-၅-၂၀၁၄)ရက်နေ့အထိ ကွင်းဆင်းသွားရောက်ခဲ့သည့် ခရီးစဉ်အတွင်း လူ့အခွင့်အရေးဆိုင်ရာသိကောင်းစရာ ရှင်းလင်း ဆွေးနွေးပွဲများကိုလည်း ပြုလုပ်ခဲ့ပါသည်။

လူ့အခွင့်အရေးနှင့်စပ်လျဉ်းသည့် အာဆီယံအစိုးချင်းဆိုင်ရာကော်မရှင်၏ လုပ်ငန်းတာဝန် သတ်မှတ်ချက်များကို ပြန်လည်သုံးသပ်ရေးအတွက် လူ့အခွင့်အရေးနှင့် စပ်လျဉ်းသည့် အာဆီယံအစိုးရချင်းဆိုင်ရာ ကော်မရှင်နှင့် ဒေသတွင်းရှိ သက်ဆိုင်ရာ အဖွဲ့အစည်းများ ညှိနှိုင်းဆွေးနွေးပွဲသို့ မြန်မာနိုင်ငံအမျိုးသားလူ့အခွင့်အရေးကော်မရှင် ပါဝင်တက်ရောက်ခြင်း

လူ့အခွင့်အရေးနှင့် စပ်လျဉ်းသည့် အာဆီယံအစိုးရနှင့်ဆိုင်ရာ ကော်မရှင် (AICHR) ၏ ဖိတ်ကြားချက်အရ မြန်မာနိုင်ငံအမျိုးသားလူ့အခွင့်အရေးကော်မရှင်အဖွဲ့ဝင် ဦးညွှန့်ဆွေ သည် အင်ဒိုနီးရှားနိုင်ငံ၊ ဂျာကာတာမြို့၌ ၂၀၁၄ခုနှစ် ဧပြီလ ၂၉ရက်တွင် ကျင်းပသော AICHR ၏လုပ်ငန်းတာဝန် သတ်မှတ်ချက်များကို ပြန်လည်သုံးသပ်ရေးအတွက် AICHR နှင့် ဒေသတွင်းရှိ သက်ဆိုင်ရာအဖွဲ့အစည်းများ ညှိနှိုင်းဆွေးနွေးပွဲသို့ ပါဝင်တက်ရောက် ခဲ့သည်။

          AICHR ၏ လုပ်ငန်းတာဝန်သတ်မှတ်ချက်တွင် အဆိုပါ လုပ်ငန်းတာဝန်သတ်မှတ် ချက်ကို  ၎င်းသက်ဝင်အတည်ဖြစ်ပြီး ၅ နှစ်အကြာတွင် ပြန်လည်သုံးသပ်ရမည်ဟု ပါရှိသည်။ ၎င်းလုပ်ငန်းတာဝန်သတ်မှတ်ချက် သက်ဝင်အတည်ဖြစ်ခဲ့သည်မှာ ၂၀၀၉ ခုနှစ် ဖြစ်သဖြင့် ၂၀၁၄ ခုနှစ်တွင် ပြန်လည်သုံးသပ်ရမည် ဖြစ်ပါသည်။ အဆိုပါ ပြန်လည်သုံးသပ်မှုအတွက် ကြိုတင်ပြင်ဆင်သည့်အနေဖြင့် AICHR သည် မိမိ၏လုပ်ဆောင်ချက်များကို သုံးသပ်ပြီး အာဆီယံနိုင်ငံခြားရေးဝန်ကြီးများ အစည်းအဝေးသို့ AICHR ၏ အကြံပြုတိုက်တွန်းချက် များ တင်သွင်းရန်ရှိပါသည်။

          AICHR သည် ၎င်းရည်ရွယ်ချက်အတွက် အာဆီယံအဖွဲဝင်နိုင်ငံအသီးသီးရှိ အရပ်ဘက်အဖွဲ့အစည်းများနှင့် ညှိနှိုင်းဆွေးနွေးပွဲ အပါအဝင် ဒေသဆိုင်ရာ ညှိနှိုင်း ဆွေးနွေးပွဲများ ကျင်းပခြင်းဖြစ်ပါသည်။ AICHR နှင့် အာဆီယံအဖွဲ့ဝင်နိုင်ငံများမှ အရက်ဘက် အဖွဲ့အစည်းကိုယ်စားလှယ်များ တွေ့ဆုံဆွေးနွေးပွဲတွင် အရပ်ဘက် အဖွဲ့အစည်း အသီးသီးတို့မှ ကိုယ်စားလှယ်များသည် AICHR အတွက် ဝေဖန်အကြံပြုချက်များ တင်သွင်းကြပါသည်။ အရပ်ဘက်အဖွဲ့အစည်း အသီးသီးတို့၏ ဝေဖန် အကြံပြုချက်များကို AICHR က အာဆီယံ နိုင်ငံခြားရေးဝန်ကြီးများထံ တင်ပြမည့်အကြံပြု တိုက်တွန်းချက်များ ပြုစုရာ၌ ထည့်သွင်း စဉ်းစားမည်ဖြစ်ပါသည်။