၁။   မြန်မာနိုင်ငံ အမျိုးသား လူ့အခွင့်အရေး ကော်မရှင်မှ ကျန်းမာရေးစောင့်ရှောက်မှုအခွင့်အရေးဆိုင်ရာ ဆွေးနွေးဟောပြောပွဲကို ၂၉-၂-၂၀၂၄ ရက်နေ့၊ ၁၃:၃၀ နာရီအချိန်တွင် သူနာပြုတက္ကသိုလ် (ရန်ကုန်) ခန်းမကြီး၌ ကျင်းပပြုလုပ်ရာ မြန်မာနိုင်ငံ အမျိုးသား လူ့အခွင့်အရေး ကော်မရှင်ဥက္ကဋ္ဌ ဦးပေါ်လွင်စိန်နှင့် ကော်မရှင်အဖွဲ့ဝင်များ၊ သင်တန်းသူ/သားများနှင့် ဖိတ်ကြားထားသည့် ဧည့်သည်များ စုစုပေါင်း (၄၅၀) ဦး တက်ရောက်ခဲ့ကြပါသည်။

၂။    ရှေးဦးစွာ မြန်မာနိုင်ငံအမျိုးသားလူ့အခွင့်အရေးကော်မရှင်ဥက္ကဋ္ဌ ဦးပေါ်လွင်စိန်က အဖွင့်အမှာစကား ပြောကြားရာတွင် မြန်မာနိုင်ငံအမျိုးသားလူ့အခွင့်အရေးကော်မရှင်သည် နိုင်ငံတော်က ဥပဒေပြဋ္ဌာန်းပြီး နိုင်ငံတော်အတွင်း လူ့အခွင့်အရေးကို မြှင့်တင်ပေးရန်နှင့် နိုင်ငံသားများ၏ လူ့အခွင့်အရေးကို ကာကွယ်စောင့်ရှောက်ပေးရန်အတွက်  တစ်ခုတည်းသော အမျိုးသားလူ့အခွင့်အရေးအဖွဲ့အစည်းဖြစ်ကြောင်း၊ လူ့အခွင့်အရေးမြှင့်တင်ပညာပေးလုပ်ငန်းများကို မြန်မာတစ်နိုင်ငံလုံးရှိ နေရာဒေသအသီးသီးမှ ပြည်သူများနှင့် နိုင်ငံတော်ယန္တရားအဆင့်ဆင့်တွင် တာဝန်ထမ်းဆောင်နေကြသော အရာထမ်း၊ အမှုထမ်းများအထိ လူ့အခွင့်အရေးအသိပညာတိုးပွားရေး ကြိုးပမ်းဆောင်ရွက်လျက်ရှိကြောင်း၊ လူမှုဘဝဖွံ့ဖြိုးရေးတွင် အရေးအပါဆုံးဖြစ်သည့် လူသားအားလုံး၏စားဝတ်နေရေးသည် အခြေခံအကျဆုံး လူ့အခွင့်အရေးများဖြစ်သည့်အပြင် ပညာရေး၊ ကျန်းမာရေးအခွင့်အရေးများလည်း လူမှုရေးဆိုင်ရာ အခွင့်အရေးများဖြစ်ကြောင်း၊ ကျန်းမာရေး အခွင့်အရေးသည် လူသားများ၏ အသက်ရှင်သန်ခွင့်နှင့် တိုက်ရိုက်ဆက်စပ်မှုရှိသည့်အတွက် လူသားများ ကျန်းမာကြံ့ခိုင်စေရန် ဆရာဝန် /သူနာပြုများနှင့် ဆေးဝါးများလုံလောက်မှုရှိရန်တို့သည် အရေးကြီးသည့် အခွင့်အရေးများဖြစ်သလို ဆေးရုံ/ ဆေးခန်းများကို လက်လှမ်းမီစေမှသာ ကျန်းမာရေးခံစားခွင့်ကို ရရှိမည်ဖြစ်ကြောင်း၊ နိုင်ငံတော်၏ လူ့ဘောင်အဖွဲ့အစည်းအတွင်း အရေးကြီးသည့် ကျန်းမာရေးအခွင့်အရေးကို အဓိကတာဝန် ယူဆောင်ကြဉ်း‌ပေးလျက်ရှိသည့် ကျန်းမာရေးဝန်ကြီးဌာနမှ တာဝန်ရှိသူများအပါအဝင် အနာဂတ်၏ သူနာပြု အလောင်းအလျာများအနေဖြင့် လူသားတို့၏ အသက်ရှင်သန်ခွင့်အပေါ် လေးစား၍ အများပြည်သူတို့၏ ကျန်းမာရေး အခွင့်အရေးများကို သိရှိနားလည်ကာ အမိတက္ကသိုလ်ကြီးက သင်ကြားပေးလိုက်သော အတတ်ပညာများနှင့်ပေါင်းစပ်ပြီး အများပြည်သူတို့၏ ကျန်းမာရေးကို စွမ်းစွမ်းတမံ စောင့်ရှောက်ပေးနိုင်ကြပါစေဟု ဆန္ဒပြုတိုက်တွန်းကြောင်း စသည်ဖြင့် အဖွင့်အမှာစကား ပြောကြားခဲ့ပါသည်။

၃။   ထို့နောက် မြန်မာနိုင်ငံအမျိုးသားလူ့အခွင့်အရေးကော်မရှင်ရုံး၊ ညွှန်ကြားရေးမှူး ဦးဇော်လွင်ထူးက လူ့အခွင့်အရေးဆိုင်ရာ အကြောင်းအရာများကိုလည်းကောင်း၊ ဒုတိယညွှန်ကြားရေးမှူး ဒေါ်မိမိခိုင်က ကျန်းမာရေးစောင့်ရှောက်မှု အခွင့်အရေးဆိုင်ရာ အကြောင်းအရာများကိုလည်းကောင်း အကျယ်တဝင့်ဟောပြောဆွေးနွေးခဲ့ကြပြီး ဆွေးနွေးပွဲအား ၁၅:၄၅ နာရီအချိန်တွင် ရုပ်သိမ်းခဲ့ပါသည်။