မြန်မာနိုင်ငံ အမျိုးသား လူ့အခွင့်အရေး ကော်မရှင်သည် ကော်မရှင်ဥပဒေပုဒ်မ ၂၂ (က) ပါ လူ့အခွင့်အရေး မြှင့်တင်ရေးနှင့် ကာကွယ်စောင့်ရှောက်ရေးတို့ကို ထိရောက်စွာ အကောင်အထည် ဖော်နိုင်ရန် လုပ်ငန်းများ အစဉ်တစိုက်ဆောင်ရွက်လျက်ရှိပါသည်။ ကော်မရှင်သည် လုပ်ငန်းလမ်းညွှန်အဖြစ် ရေးဆွဲထားသော ရှေ့လုပ်ငန်းစဉ်မူဘောင်ပါ ပန်းတိုင်၊ ရည်မှန်းချက်များနှင့်အညီ နှစ်အလိုက် လုပ်ငန်းစီမံချက်ကိုရေးဆွဲ၍ လုပ်ငန်းများကို အကောင်အထည်ဖော်လျက်ရှိပါသည်။

          မြန်မာနိုင်ငံ အမျိုးသား လူ့အခွင့်အရေး ကော်မရှင်ရုံးမှ လက်ထောက်ညွှန်ကြားရေးမှူး ဦးကောင်းခန့်ဇင်သည် လူမှုဝန်ထမ်းအတတ်သင်သိပ္ပံကျောင်း (မရမ်းကုန်း) တွင် ဖွင့်လှစ်လျက်ရှိသည့် “သက်ကြီးရွယ်အိုများပြုစုစောင့်ရှောက်သူသင်တန်း ” သို့ ၁၈-၃-၂၀၂၆ ရက်နေ့၊ ၀၉း၀၀ နာရီမှ ၁၂း၀၀ နာရီအချိန်ထိ လူ့အခွင့်အရေးဆိုင်ရာ သင်ခန်းစာများသွားရောက်ပို့ချခဲ့ပါသည်။ အဆိုပါသင်တန်းတွင် သက်ကြီးပုဂ္ဂိုလ်ပြုစုစောင့်ရှောက်သူများသည် ဘိုးဘွားများ၏ ကျန်းမာရေးသာမက ၎င်းတို့၏ လူသားဂုဏ်သိက္ခာကိုပါ စောင့်ရှောက်သူများဖြစ်ကြောင်း သိရှိနားလည်စေရန်ရည်ရွယ်၍ လူ့အခွင့်အရေးအခြေခံ အယူအဆများအကြောင်း၊ ကမ္ဘာ့လူ့အခွင့်အရေးကြေညာစာတမ်းအကြောင်း၊ မြန်မာ နိုင်ငံ အမျိုးသား လူ့အခွင့်အရေး ကော်မရှင်ဖွဲ့စည်းခြင်းနှင့် လုပ်ငန်းဆောင်ရွက်ချက်များအကြောင်း နှင့်  သက်ကြီးပုဂ္ဂိုလ်များဆိုင်ရာအခွင့်အရေးတို့ကိုဆွေးနွေး ပို့ချခဲ့ပါသည်။ သင်တန်းတွင် သင်တန်းသား ၆  ဦး၊ သင်တန်းသူ  ၁၂   ဦး၊  စုစု‌ပေါင်း ၁၈  ဦး တက်ရောက်ခဲ့ကြပြီး သိရှိလိုသည့်မေးခွန်းများကို မေးမြန်းခဲ့ကြရာ လက်ထောက်ညွှန်ကြားရေးမှူး ဦးကောင်းခန့်ဇင်က ပြန်လည်ဖြေကြားခဲ့ပါသည်။

မြန်မာနိုင်ငံအမျိုးသားလူ့အခွင့်အရေးကော်မရှင်